luns, 23 de decembro de 2019

venres, 13 de decembro de 2019

VOLUNTARIADO DA BIBLIO.

O noso voluntariado constitúe o verdadeiro motor da Biblio de Carola. Son nenas e nenos de 5º e 6º que están dispostos a entregar o seu tempo libre para colaborar nos recreos e facer que todo sexa áis sinxelo e emocionante.

Todos agardamos que o voluntariado sexa un pouco "activista" e animen e dinamicen. Pero neste caso, máis alá de toda expectativa, houbo que "reformular" os criterios de pertenza ao voluntariado. Un grupo ben nutrido de 4º de primaria "irrumpiron" na biblio aludindo que tamén querían ser voluntari@s.

Bendita irrupción!!

En virtude do proxecto de Bibliotecas Escolares Solidarias, os voluntarios "oficiais" son os de 5º e 6º. Os voluntarios de 4º están de colaboradores de reforzo, nos recantos que máis o precisan ou que quedaron sen voluntario.

Así que agora o voluntariado está formado por alumnado de 3 niveis.








Incluso participaron no PLAN DE FORMACIÓN DO VOLUNTARIADO.

Nos días de formación, sempre nos seus tempos libres dos recreos, coñecemos e traballamos sobre a organización do espazo,  a colocación dos fondos, a clasificación da CDU, actitudes para exercer o voluntariado, novas propostas...

Unha das súas suxestións foi que querían parecer voluntarios, algo que os identificara. Así foi como chegaron á biblio os mandís d@ voluntari@. Como non podía ser doutro xeito no curso en que traballamos o PDI COMO! como?

 
Así de fachendos@s posaba un grupo con seus mandís


Durante a formación tamén se dou a posibilidade de que cadaquen manifestara as súas preferencias sobre os recantos, aqueles onde o podían pasar mellor, ou podían facee mellores aportacións. Na seguinte táboa aparecen os recantos onde prefiren colaborar, e á dereita as tardes que teñen dispoñibles para formación, programación, mantemento da biblio... Vamos! un luxo de voluntariado





Para o curso 2029/2020 o voluntariado prestará o seu traballo ao longo das semanas que elixan. Así o manifestaron no CONTRATO asinado no mes de xaneiro. A continuación podemos ver o número d@s voluntari@s que corresponden a cada semana de cada mes.


A tarefa de cada voluntari@ é moi importante e cada recanto. Durante unha semana, son os responsables de que ese recanto funcione e conte con todo o necesario. Para iso deberán entregar anteriormente a ficha correspondente ao recanto asignado.

Caixas correspondentes a 6 dos recantos que hai no espazo creaTIvo.
Cada unha das FICHAS que aparece nas caixas recolle:
  • NOME da actividade proposta
  • MATERIAIS necesarios
  • PROCESO de elaboración
  • EXEMPLO GRÁFICO, ben en forma de debuxo, foto ou o obxecto real rematado








DECEMBRO 2019. EXPOSICIÓN DO NADAL COAS LIBRARÍAS


NA TÚA CARTA AOS REIS, UN LIBRO TAMÉN


 
No CEIP de Figueiroa, cando chega o Nadal, é tradición facer unha exposición coas seleccións de libros que fan as nosas librarías locais. Ademais de contar coa súa valoración profesional, tentamos fomentar a compra no comercio local.

 

Dende sempre a resposta das nosas libreiras e libreiros foi moi positiva, pero nos últimos anos está a ser realmente excepcional. No cole estamos abertos a todas as suxestións que nos fan chegar, posto que se trata dun traballo colectivo entre librarías e colexio. Pero, como xa hai confianza, atrevémonos a facer peticións, recomendacións que atinxen a:

  •  contar cun número importante de libros informativos. Sabemos que a literatura vai estar presente, pero o libro informativo precisa dun pulo, dunha axuda para ocupar o lugar que lle corresponde
  •  que a lingua galega sexa a maioritaria na exposición de libros, pois tamén a nosa lingua precisa de axuda
  • e como un engadido, para "darnos un capricho", pedimos fondos relacionados coa temática do proxecto que estamos a traballar. Neste curso ocupámonos dos ALIMENTOS, no proxecto denominado "COMO! como?"
  

 Para controlar o aforo da exposición, era necesario contar cunha 
"entrada", que como non podía ser doutro xeito, era un utensilio de cociña. 










Cada libraría conta cun espazo ben definido, onde amosar a súa selección. Todo o Equipo de Biblioteca, xunto co voluntariado mimou e coidou a exposición.




Voluntarios sinalandos os lugares destinados á exposición, cos mandiles que estreamos este ano.



 En cada unha destas mesas hai unha zona definida por un mantel negro, onde se expoñen os libros relacionados cos alimentos. Á vista está que non escatimaron...

Libraría PINTALETRAS

Libraría FARO

Libraría DURÁN

Libraría MARXE

Libraría LOLIMAY

 
Todas as librarías fixeron aportacións, que de seguro van espertar moitos desexos de lectura (e de xantares!). O tema do idioma é o que máis costa, pero o mercado e a oferta son os que son. Aínda así, hai quen fai pedidos a propósito.



A exposición pode visitarse, por parte do alumnado ben na hora de biblioteca que cada clase ten asignada, ben nos recreos, onde será atendido polo grupo de voluntariado da biblio. As familias e o público en xeral, poderá coñecer a exposición  dende o martes 10 de decembro ao martes 17, en horario de 16:00 a 18:00.

Dentro desta campaña de FOMENTO DA LECTURA e do CONSUMO NO COMERCIO LOCAL, é importante engadir que todos os centros educativos do concello con Bibliotecas que forman parte do PLAMBE (Plan de Mellora das Bibliotecas Escolares) editamos unha GUÍA DE RECOMENDACIÓNS DE LECTURA. Esta guía chega ás casas de nenas e nenos que van aos coles de Pérez Viondi, Oca, Codeseda, Foxo e Figueiroa . Pero a difusión é maior, xa que tamén as bibliotecas dispoñen desta guía e o concello da Estrada tamén a publica na súa Axenda Cultural.

A esxposición estivo moi concurrida: